प्रतिनिधि सभा बैठकमा विपक्षी दलहरूले शहीदको स्मरणमा पाँच मिनेट मौनधारण गर्दै विरोधको नयाँ शैली अपनाएका छन्।
सामान्यतः संसदमा शहीद वा विशेष व्यक्तिहरूको सम्मानमा एक मिनेट मौनधारण गर्ने प्रचलन रहे पनि मंगलबारको बैठकमा प्रमुख प्रतिपक्षी दलको अगुवाइमा यो अवधि पाँच मिनेटसम्म विस्तार गरिएको हो।
सीमा सम्बन्धी विषयमा प्रधानमन्त्रीले दिएको भनिएको अभिव्यक्तिप्रति माफी मागिनुपर्ने माग विपक्षी दलहरूले उठाउँदै आएका छन्। सो माग सम्बोधन नभएसम्म संसद् अवरोध गर्ने अडानबीच काँग्रेसका सचेतक निष्कल राईले मौनधारणको प्रस्ताव अघि सारेका थिए।
उनले नेपाल एकीकरणदेखि लिएर विभिन्न कालखण्डमा देशको स्वतन्त्रता, सार्वभौमिकता र अखण्डताका लागि योगदान दिने ऐतिहासिक व्यक्तित्वहरूको योगदान स्मरण गर्दै उनीहरूको सम्मानमा मौनधारण गर्न आग्रह गरे।
उनले वर्तमान प्रधानमन्त्रीको विगतको राजनीतिक भूमिकासमेत उल्लेख गर्दै इतिहास र राष्ट्रिय स्वाभिमानबारे बुझाइको प्रश्न उठाएका थिए। साथै, देशको सीमा र राष्ट्रिय सम्मानसँग जोडिएका विषयमा उठाइएका अभिव्यक्तिले शहीदहरूको त्यागप्रति असर पर्ने टिप्पणी पनि उनले गरेका थिए।
त्यसपछि उनले शहीद, विभिन्न आन्दोलनका सहिद तथा हालका समसामयिक राजनीतिक आन्दोलनमा ज्यान गुमाउनेहरूको स्मरणमा पाँच मिनेट मौनधारण गर्न आह्वान गरेका थिए।
उनको आह्वानपछि अन्य विपक्षी दलका सांसदहरू पनि उठेर मौनधारणमा सहभागी भएका थिए।
